Mar 14 | KYG | STEP | Lole afina'mo utesigeno'ae'mo Yu vaya'ai Pasova hopa afina'mo peleti mayamo aeno apafu noleya peleti mayamo ne'naya afina'mo afole aigefe hu'niye. Mono hu'a ne'apataya vaya'aite'mo yagai'a ne'apataya vaya'e ke'aepa gemo avo'mo kae'a ali'a apaya ne'malaya vaya'mogi'e'mo kesi kateti'mo u'a Yesu'mo atafau'a kamiti amagisaya kafe'mo kahauya hu'a mai'nae.

Mark 14

1 Lole afina'mo utesigeno'ae'mo Yu vaya'ai Pasova hopa afina'mo peleti mayamo aeno apafu noleya peleti mayamo ne'naya afina'mo afole aigefe hu'niye. Mono hu'a ne'apataya vaya'aite'mo yagai'a ne'apataya vaya'e ke'aepa gemo avo'mo kae'a ali'a apaya ne'malaya vaya'mogi'e'mo kesi kateti'mo u'a Yesu'mo atafau'a kamiti amagisaya kafe'mo kahauya hu'a mai'nae. 2 Mai'ne'apae'mo, fiku yanage'a ne'atafausunage'apae'mo hopa afina'moge'a avavu ali'a lamagigayanagi o'atafaigetao, hu'a hu'nae.

Mago a kanomo'a Yesu agufale'mo uvelimo faleno ate'niya gemae

(Mt 26:6-13; Yo 12:1-8)

3 Yesu'a Metani taonifi'mo Saimoni'a lepalosi ya'mo hauno hage'niya vekamo nopi'mo mai'niye. Ne'ya'mo ne'negeno'ae'mo mago a kanomo'a alagepa atumo ne'aiya uvelimo lusi monileti'mo miya nefaiya uvelimo yafa kepi uvelimo alinineno ani uveli ke'mo aino atagi male'neno agenopafi'mo aeno lakino faleno ate'niye. 4 Mago vaya'mo anifi mai'naya vaya'mogimo agete'a apaipa le'a atete'a apakai'apimo, na kava higeno'ae'mo alagepa atumo ne'aiya uvelimo alinineno fiku lakino faleno ate'niye. 5 Ani uvelimo maketi hu'nonesinana tali hataleti kinamo aliteta kagemi ya'apimo ohane'nisiya vaya'aina aliniteta apamunesine, hu'a hute'a ge hau'nae. 6 Yesu'a, na kava higetapae'mo kanamo alitapa ne'amiye. Nagaetegamo lusi alagepa kava'mo huno ne'nate. Afa'a ataleyo. 7 Kagemi ya'apimo ohane'niya vaya'mo muki afina'mo lapakae'e'mo lokae'a ne'maiya'mofe'mo lapausiya afina'mo apakaemo alagepa hutapa hapa maegaya'monanafa nagaemo muki afina'mo lapakae'e'mo lokae'na o'maiguve. 8 Afa'a hu'niyesina agufa kava'mo ago huno nate'niye. Hogoteno nagufamo alino alo huno nate'niyanage'na falisuge'apae'mo kanolufi'mo ki'a nategae. Kanolufi'mo ki'a natesayafe'mo alagepa atumo ne'aiya uvelileti'mo faleno nate'niye. 9 Alagi lama gemo lapa nepauve, huno, vaya'mogimo nava gemo mani alagepa faigoko ge'nimo alini'u'a muki haopalegamo ae'a hakalo hu'a hapa paisage'a afisaya vaya'mogimo mani a kanomo'a hu'niya kavafe'mo apakesamo afisayafe'mo ava gemo hu'a hapa paigae, huno hapa pai'niye.

Yutasi'a kutulu ya'mo aliguve, huno hu'niya gemae

(Mt 26:14-16; Lu 22:3-6)

10 Hapa paitegeno'ae'mo Yutasi'a ge'amo ne'afiya vekamo tuolofu'a vayapati vekamo apataleno mono hu'a ne'apataya vaya'aite'mo yagai'a ne'apataya vaya'aitegamo Yesu'mo avaleno apamisiyafe'mo u'niye. 11 Uno hapa paino'ae'mo, avaleli'ne'na lapamiguve, huno hapa pai'nige'apae'mo apamogaga aite'a, mago kutulu monimo hageta kamigune, hu'a hu'nageno'ae'mo avalelinuno apamisiya kafe'mo aepa faino kahauya huno mai'niye.

Pasova ne'ya'mo ne'naya kavafe'mo ava gemo hu'niya gemae

(Mt 26:17-25; Lu 22:7-14; 22:21-23; Yo 13:21-30)

12 Yu vaya'mogi aeno apafu noleya peleti mayamo ne'naya hopa afinapati'mo hogote hopa afina'mo aikeli sipisipimo apamagi'a Pasova ne'ya'mo ne'naya afina'mo afole ai'niye. Afole ai'nige'apae'mo Yesu ge'amo ne'afiya vaya'mogi hu'apae'mo, Pasova ne'ya'mo nesunafe'mo haiya'alegamo uta alo hisune, hu'a afi ge'nae, 13 Yesu'a lole vekala'anife'mo, alopa taonifi'mo uta haitana ani ke'ina alinino ne'esiya veka'e'mo fotu hutetanae'mo akame hutana vi'ao. Haisiya nopi vekae'mo, Tisa vekamo'a huno'ae'mo, nagae'e ge'nimo ne'afiya vaya'e'mo Pasova ne'ya'mo nesuna no'mo haiyate'mo hane'niye, huno hu'niye, hutana ge hutana afi ge'ao. 15 Agaemo lana valelinuno haino anaga agotofule nopi'mo aeno anagi malefa no'mo alo hu male'niyanageno alino lana veligiye. Ani nopi'mo Pasova ne'ya'mo alo hi'ao, huno hana paiteno alino anate'nige'ana u'na'ae. 16 Ge'amo ne'afi'a vekala'mo taonifi'mo u'ana Yesu'a hana pai'niya kava'mo hu'ana agete'ana Pasova ne'ya'mo alo hu'na'ae. 17 Yegemo lamino fale'nige'apae'mo Yesu'e tuolofu'a vaya'mo ge'amo ne'afiya vaya'e'mo e'a nopi'mo hai'a mai'nae. 18 Hi'yalamute'mo mai'ne'a ne'ya'mo ne'ne'apae'mo Yesu'a, alagi lama gemo lapa nepauve, huno, lapakaepati'mo mago vekamo nagae'e'mo magokepi mai'neno ne'ya'mo ne'neya vekamo'a kame vaya'aina navaleno apamigiye, huno hapa pai'niye. 19 Hapa pai'nige'apae'mo ge'amo ne'afiya vaya'ai apaipamo'mo lusi kava huno kana hu'nige'apae'mo apamete apamete hu'a, nagaefe'mo nehapiye, hu'a afi ge'nageno'ae'mo, 20 Lapakaepati vekamo'a nagae'e'mo magokepi lokaeno mai'neno peleti mayamo aliteno yuvapafi anipi'mo alino aeteno ne'niya vekamae, huno hu'niye. 21 Huteno, Vemo mafa'nemo'mo Goti mukufi'mo avo'mo kae male'naya kate'mo afa'a ugiya'monanafa kutulu ya'mo ali'niya vekalegamo lusi aiye aiye avovo kava'mo afole aigiye. Ita'amo'mo alino o'ate'niyesinana agaetefe'mo kanale hu'niyesine, huno hapa pai'niye.

Ala kava ne'mo kave'mo ne'naya gemae

(Mt 26:26-30; Lu 22:15-20; 1 Ko 11:23-25)

22 Ne'ya'mo ne'ne'apae'mo Yesu'a peleti mayamo ali'neno Gotife'mo hao ke heteno alino akaya heno ge'amo ne'afiya vaya'aina apamiteno'ae'mo, manimona nagufa'nimogi alitapa neyo, huno hu'niye. 23 Huno huteno kapumo ali'neno Gotife'mo hao ke heteno apami'nige'a muki'amogimo ani kapufati'mo ne'nae. 24 Agaemo huno'ae'mo, mani kapufi ani'mo kola'nimae. Goti'a ma kava'mo huguve, huno hu male'niya saufa kotalake gemo afole aisiyafe'mo muki asole vaya'aitefe'mo ai'na lakiguve. 25 Alagi lama gemo lapa nepauve, huno, halate nofi alagafati ani'mo o'ne'na maime maime ne'visugeno'ae'mo Goti'a yagaino ne'apateya koteti'mo saufa ani'mo lapakaegi'e'mo magokepi negaune, huno hapa pai'niye. 26 Apakaemo mono yokemo hute'a kumatega u'a lamite'a Alifi'aepa avefi'mo hai'nae.

Yesu'a Pitafe'mo, o'age'nova vekae, huka hugane, huno ha pai'niya gemae

(Mt 26:31-35; Lu 22:31-34; Yo 13:36-38)

27 Yesu'a, Hemeni hani'ilagamo nagaete'mo afole aisiya kavatefe'mo muki'amogitapa ago asagautapa aigae. Goti Mukufi'mo avo'mo kae male'niya gemo'mo ani kavafe'mo huno'ae'mo,

Nagaemo sipisipile'mo yagaino ne'apateya vekamo ne'amagisuge'apae'mo sipisipi anaga'amo atagu fae'a apaune he'a u e'a hugae,
huno hu'niye. 28 Hu'niya'monanafa kanolufati'mo halate ago alino he tino natesige'nae'mo Galeliya kotegamo u'na hogo netesugetapa ugae, huno hapa pai'niye. 29 Pita'a, muki vaya'amo ago katale'a ugaya'monanafa nagaemo alagi katale'na o'uguve, huno ha pai'nigeno'ae'mo, 30 alagi lama gemo kaha nepauve, huno, ani hani'ilagamo kokolemo'mo lole afina'mo age o'ai'nisigekae'mo nagaefe'mo lole'e mago'e afina'mo hukae'mo, o'age'nova vekae, huka hugane, huno ha pai'nigeno'ae'mo 31 Pita'a mago'e huno lokiya gefati'mo huno'ae'mo, kagae'e'mo magokepi faligu'anage'na alagi o'age'nova vekae, hu'na osuguve, huno hu'nige'apae'mo ge'amo ne'afiya vaya'mo muki'amogimo ani agufa gege'mo hu'nae.

Getesemani hoyafi'mo uno nunumu hu'niya gemae

(Mt 26:36-46; Lu 22:39-46)

32 Apakaemo mago mopamo agi'amo Getesemanimo ute'apae'mo Yesu'a ge'amo ne'afiya vaya'aife'mo, manile mai'nige'nao nagaemo u'na mugalega nunumu hino, huno hapa paiteno apataleno 33 Pita'agi Yemisi'agi Yoni'agi huno apavalelino u'niye. Agaemo aepa faino lusi kava huno hau aiteno'ae'mo amo'ya ai'nigeno 34 hapa paino'ae'mo, hosu kava'mo'a faino ku aino yagaino nate'nigeno naipamo'mo lusi kava huno kana hu'nige'na falisuva naipamo nekaliye. Manile'mo mai'netapa kava yagaitapa maiyo, huno hapa pai'niye. 35 Apatalenuno aise afagi'ale'mo mopafi'mo asagauno aino ago'ya fai'neno'ae'mo hosu afina'mo faino kasalo paesiyafe'mo nunumu hu'niye. 36 Nunumu huno'ae'mo, Afo'nimogae, huno, kagaemo muki kava'amo huguve huka hisana kava'mo afa'a hugane. Mani kapumo nagaetegati'mo alinikuka atalo. Ani gemo huva'monanafa nagaemo nahau'niya kava'mo osuka kagaemo kahau'nisiya kava'mo afa'a huvo, huno nunumu hu'niye. 37 Nunumu huteno aino atagi neno eno apakeyana lole'e mago'e vaya'mo ge'amo ne'afiya vaya'mo apau kale'a mai'nageno apaketeno'ae'mo Pitafe'mo, Saimoniyo, huno, kau kale'napiye. Magoke aovamo afa'a yagaika o'mai'napiye, huno afi ge'niye. 38 Apakaefe'mo, lapamalageka hisiya kavapi'mo haitapa ofalesayafe'mo yagaitapa mai'netapa nunumu hiyo. Lapaunelapame'mo'a huno'ae'mo, afa'a hugune, huno nehiya'monanafa amega lapakufamo'a hisayafe'mo lokiya no'vaiye, huno hapa pai'niye. 39 Halate apatalenuno hogoteno hu'niya agufa gemo huno nunumu hu'niye. 40 Huteno aino atagi neno eno apakeyana apau mai mai hu'nige'a apau kale'a mai'nageno apake'nige'apae'mo, haiya agufa gemo husupi, hu'a apakesamo o'afi'nae.

41 Lole'e mago'e afina'mo halate aino atagi neno uno hapa paino'ae'mo, maitapa falu hutapage'mo lapau kaletapa mai'nafiye. Hai'mae. Ani afina'mo ago afole aiyanagi ageyo, huno, apakaemo Vemo Mafa'nemo avaleli'u'a hosu vaya'ai apayapi'mo atesayafe'mo ne'ae. 42 He tita vigetao. Ageyo, huno, nagae kutulu ya'mo ali'niya vekamo ago ne'e, huno hapa pai'niye.

Yesu'mo atafau'a ayatalate'mo nofi ki'a ate'naya gemae

(Mt 26:47-56; Lu 22:47-53; Yo 18:3-12)

43 Yesu'a ani gemo nehigeno'ae'mo Yutasi'mo tuolofu'a vayapati vekamo ge'amo ne'afiya veka'e asole vaya'e'mo naipe alige kayo'mo alige huli'a e'nae. Mono hu'a ne'apataya vaya'aite'mo yagai'a ne'apataya vayanagi ke'aepa gemo avo'mo kae'a ali'a apaya ne'malaya vayanagi vayatama vayanagi hu'a ali'a apate'nage'a e'nae. 44 Kutulu ya'mo ali'niya vekamo'a hogotenuno alagena kava'mo hisiyafe'mo, u'na hae'na nesuva veka'ina ani vekamogi utapa atafauta avalelitapa viyo, huno hapa pai'niye.

45 Yutasi'a uno ava'yi huteno'ae'mo Yesufe'mo uno, Tisao, huno huteno haeno ne'niye. 46 Haeno ne'nige'apae'mo u'a Yesu'mo atafau'nae. 47 Ne'atafageno'ae'mo agae'e'mo he tino mai'niya vekamo'a naipemo asagino hogote vekamo mono hu'a ne'apataya vaya'aite'mo yagaino ne'apateya vekamo ali'ya'amo ne'aliya vekamo agesamo heno lafe huno atale'niye. 48 Yesu'a, vaya'mo apamagite'a kumaya'mo ne'aliya vaya'aina kalavusi hu'a apatesayafe'mo naipe alige kayo'mo alige huli'a ne'aya kava hutapa alinitapa nagaetegamo ne'afiye. 49 Nagaemo muki afina'ae afina'ae'mo lapakae'e'mo magokepi mai'ne'na alopa mono nopi'mo ali'na apaya male'na mai'nova afina'mo o'natafau'nae. O'natafau'naya'monanafa Goti Mukufi'mo avo'mo kae male'naya gemo alagi afole aisiyafe'mo hu'niye.

50 Ani gemo hutege'apae'mo muki ge'amo ne'afiya vaya'mo atale'a apaune he'nae. 51 Mago neya vekamo'a yaveyave lavolavo'age'mo vaili'niya vekamo'a Yesu'mo akame huno ne'vige'apae'mo neya vaya'mogimo atafau'a lavolavo'age'mo asagi'a alitageno agufa'alaga'ageke'mo ataleno aune heno u'niye.

Kanisole vaya'mogimo agoti hu'a ate'naya gemae

(Mt 26:57-68; Lu 22:54-55; 22:63-71; Yo 18:13-14; 18:19-24)

53 Apakaemo Yesu'mo avaleli'u'a hogote vekamo mono hu'a ne'apataya vaya'aite'mo yagaino ne'apateya vekamo nopi'mo hai'nae. Muki vaya'amo mono hu'a ne'apataya vaya'aite'mo yagai'a ne'apataya vayanagi vayatama vayanagi ke'aepa gemo avo'mo kae'a ali'a apaya ne'malaya vayanagi hu'a mai'nae. 54 Pita'a apamasa hulinuno hogote vekamo mono hu'a ne'apataya vaya'aite'mo yagaino ne'apateya vekamo no kumate'mo haino kava ne'yagaiya ati vaya'e'mo atale'mo loto hu'a mai'nae. 55 Mono hu'a ne'apataya vaya'aite'mo yagai'a ne'apataya vaya'e kanisole vaya'mogi'e'mo Yesu'mo amagisageno falisiya gemo afisayafe'mo kahauya hu'nayana o'afi'nae. 56 Asole vaya'mogimo aigofe faigoko gemo hu'naya'mofe'mo magoke agufa gemo osu'nafa alu ge alu gemo hu'nage'apae'mo amagisageno falisiya gemo alagi o'afi'nae. 57 Hu'nage'apae'mo mago vaya'amogi he ti'a Yesufe'mo aigofe gemo hu'nae. 58 Apakaemo hu'apae'mo, afi'nonageno alopa mono no'mo vaya'mogi apayateti'mo ki male'naya nofe'mo he'na halagape vaite'na lole'e mago'e afina'mo utesige'na vaya'mogi okisaya agufa kava hu'na kiguve, huno hu'nigeta afi'none, hu'a hu'naya'monanafa 59 apakaemo alu ge alu gemo hu'nae. 60 Hutageno'ae'mo hogote vekamo mono hu'a ne'apataya vaya'aite'mo yagaino ne'apateya vekamo'a ani vaya'ai apaulagale'mo he tino Yesufe'mo huno'ae'mo, magoke gemo aeka atagaina huka osugapiye. Haiya agufa faigoko gemo kagaetegamo nehae, huno afi ge'nigeno'ae'mo 61 ge'ale'mo aeno atagaina huno ha opaino afa'a mai'niye. Mono hu'a ne'apataya vaya'aite'mo yagaino ne'apateya vekamo'a halate loka huno'ae'mo, Kalaisigamo hao ke nehaya vekamo mafa'ne'amo mai'napiye, huno afi ge'nigeno'ae'mo 62 he, mai'nove, huno ha paiteno, lapakaemo agegayana vemo mafa'nemo'a ayamufa'age vekamo lamaga haopale'mo fai mai'neno he tino hiyapi'mo eminesigetapa agegae, huno ha pai'niye. 63 Hu'nigeno mono hu'a ne'apataya vaya'aite'mo yagaino ne'apateya vekamo'a ani gemo afiteno'ae'mo agai'a agufaleti'mo yatala kukena'amo alino apake aino ataleteno, mago'e vaya'mogi e'a faigoko ge'amo hu'a laha paisageta afisuna gemo ohanegaiye. 64 Gotife'mo huno faipa huno ate'niya gemo ago afi'nagi na agufa kavafe'mo lapakesamo afiye, huno apafi ge'nige'apae'mo muki vaya'mogi hu'apae'mo, hosu gemo hu'niyanageno afa'a faligiye, hu'a hu'nae.

65 Mago vaya'amogi aepa fai'a apavenatu'na he'a atege augosafi'mo lavolavoleti'mo hayae'a ate'ne'a siki kayo'mo amagite'apae'mo, ina la'mo kamagi'nifigi kaune gemo huka laha paiyo, hu'a huge huge hu'a mai'nae. Ati vaya'mogimo lusi kava hu'a amagi'nae.

Pita'a Yesufe'mo o'age'nova vekae, huno hu'niya gemae

(Mt 26:69-75; Lu 22:56-62; Yo 18:15-18,25-27)

66 Pita'a kuma afelaga mai'nigeno'ae'mo hogote vekamo mono hu'a ne'apataya vaya'aite'mo yagaino ne'apateya vekamo kayokayo a'mafa'nemo e'niye. 67 Eno ageyana Pita'a atale'mo loto huno mai'nigeno aulu haeno ageno alagepa huno age'neno'ae'mo, kagaemo Nasalasa taonifi vekamo Yesu'e'mo mai'na'ae, huno ha pai'nigeno'ae'mo 68 ha'ao, huno huteno'ae'mo, nehana gemo no'afugi na agufa kavafe'mo ani gemo nehapi hu'na o'afuve, huno huteno no folagapi'mo u'e'a nehaya kate'mo uno mai'nigeno kokolemo'mo age ai'niye. 69 Kayokayo a'mafa'nemo'a ageteno halate anile mai'naya vaya'aife'mo, apakaepati vekamo mai'niye, huno hapa pai'nigeno 70 Pita'a halate mago'e gemo huno'ae'mo, o'age'nove, huno hu'niye. Aise afina'mo utege'apae'mo anile'mo he ti'a mai'naya vaya'mogimo Pitafe'mo, lama gemo hune, hu'a, alu kagemo ne'ainageta afi'nona'mofe'mo Galeliya kotega vekamo mai'nane. Galeliya kotega vekamo mai'nana'mofe'mo apakaepati vekamo mai'nane, hu'a hu'nageno 71 Pita'a, lama gemo nosisuvana Goti'a afa'a namagigiye. Anagati'mo alagi lama gemo nehuvana o'age'nova vekae, huno hapa pai'niye. 72 Hapa nepaigeno'ae'mo kokolemo'mo lole afina'mo age ai'nigeno'ae'mo Yesu'a Pitafe'mo hogoteno ha paino'ae'mo kokolemo'mo lole afina'mo age o'ai'nisigekae'mo nagaefe'mo lole'e mago'e afina'mo o'age'nova vekae, huka hugane, huno ha pai'niya gee'mo agesamo afino ho huteno avi'ya'mo hu'niye.